هێرشە ئاسمانیەکانی ئیسرائیل بۆسەر بنکە ئەتۆمی و ناوەندی موشەکە بالیستیەکان و سەربازی و ڕادارات و فڕۆکەخانەکانی ئێران بۆ زۆرێک لە چاودێران لەناکاو بوو ، چونکە بڕیاردرابوو کە دوو ڕۆژی دادێ واتە ڕۆژی یەکشەمەی 2025/6/15 کۆبوونەوەی دانوساندن لەنێوان شاندی ئەمەریکا و ئێران ئەنجام بدرێت و ، ئەوەش ڕاگەیەنرا کە هەمان ڕۆژ کوڕە بچوکەکەی نتنیاهۆ-ی سەرەک وەزیرانی ئیسرائیل ئاهەنگی ژن مارەکردن دەگێڕێت ، « ماقولیش نیە ئاهەنگی مارەکردن لەناو جەنگ بکرێت ! » ئەمە جۆرێکە لە فریودانی ستراتیژی « الخداع الاستراتیجی » ،  ئێران  فریودرا ، بەڵام ئەوەی زۆر جێگەی سەرسوڕمانە ئەوەیە کە دەرچوو ئێران وڵاتێکە دزەیپێکراوە « الاختراق » کراوە لەڕووی ئەمنی و هەواڵگری  لە ناوەوە و ،  فڕۆکەکانی ئیسرائیل بە ئازادانە بەسەر ئاسمانی ئێران-دا دێن و دەچن و بۆردومان دەکەن و ، هەروەها ئیسرائیل زۆر بە سانایی ژمارەیەک لە گەورە سەرکردەی سەبازی و زانای دیاری ئەتۆمی بکوژێت  کە پێشتریش زانای تری ئێرانی کوشت  ،  ئەو کوشتنانەی کە ڕوویاندا وەکو گەمەکانی زیرەکی دەستکرد دێنەبەرچاو  ، وادیارە ئێران ئاشکرایە و ، ئەوەی لەبیرچوو کە دوای لەناوبردنی هێڵی یەکەم کە حزب الله بوو  کە ئەویش و بزووتەوەکانی تری مقاوەمە ئیختراقکرابوون و ،  سەبری ستراتیژی ئێران یان خۆلادان لە چوونەناو  ڕاستەوخۆی جەنگ لەگەڵ ئیسرائیل بووە ڕابردوو  و  ئەو سەرکردە سەربازیانەی ئێران کە داوای سەبری سترایژیشیان  دەکرد کوژران و ، باڵ و ملیشیاکانیشی لە دەرەوە گەیشتونەتە ئەو باوەڕەی کە خۆیان لەو جەنگە تێوەنەگلێنن چونکە ئەوانیش جگەلەوەی ئیختراقکراون  بەشداریان لەو جەنگە بە کارێکی  بێهودە و عەبەسی دەزانن  ، دزەپێکردنی ئەمنی بۆتە شتێکی دووبارە کە بەرپرسانی ئەمنی و سەربازی ئێرانی و نا ئێرانی بوونەتە قوربانی  ، پڕۆسەی کوشتنی بەرپرسانی باڵای ئێران بۆتە کارێکی ووردبین و ئاسان ، نموونە کوشتنی ئیسماعیل هەنیئەی سەرۆکی بزووتنەوەی حەماس لەناو خاکی ئێران ، ئەمە ئەوە دەگەیەنێت کە خاکی ئێران سەلامەت نیە هەتا بۆ هاوپەیمانەکانیشی ،  وادیارە کە دوژمنی یەکەمی ئێران لەناوخۆیدایە و ئەو شەڕەی لەناوخۆ نەک لە دەرەوە دۆڕاندووە ، کە ئەمەش متمانە لەنێوان نیزامەکە و دەزگا و باڵە سەربازیەکانی لە دەرەوە تووشی داخوران کردووە.

ڕووداوەکانی ئێران ئەوە دەسەلمێنێت کە تا ئێستا ئیسرائیل دەستێکی درێژی هەوڵگری هەیە، ئیسرائیل  کە بۆتە تاکە ئیمڕاتۆری خۆرهەڵاتی ناوەڕاست دەیەوێت ڕۆژهەڵاتی ناوەڕاستێکی لە چەک داماڵدراو ببینێت و ، دەتوانین ئەوە بڵێن کە خۆرهەڵاتی ناوەڕاست وەکو خۆی نامینێت و جەنگ بووە واقیع لەنێوان هێزی گەورە بە چەک و تەکنۆلۆژیا و  پێداگریی ئایین کە سەرکەوتن بە هێزی خوداوەند زامنکراوە، ئیسرائیل وای دەبینێت کە ئەو جەنگەی لەگەڵ ئێران ئەلقەیەکە لە ئەلقەکانی گۆڕانی خۆرهەڵاتی ناوەڕاست ، پرسیارە گەورەکە ئەوەیە : ئایا هێزی ئاشتی و گەشەپێدان و بونیاتنان لەنێو ناوچەیەک کەوا گڕدەگرێت چی دەکات ؟! ئێستا حساباتەکان وورد و مێژوویین و ئەوەی تێدانیە کە بگەڕێتەوە دواوە و ، لەبەرژەوەندی ئێران و هەموو ناوچەکەش ئەوەیە کە ئەو جەنگە ڕاوەستێت و ، ئەمە پێویستی بە بڕیارێکی ستراتیژی  وەک ئەو بڕیارەی ئیمام خومەینی هەیە کە جەنگی لەگەڵ عێراق ڕاگرت و ئەمەی وەک خواردنەوەی گڵاسە  ژەهر دانا .