هەرێم نیوز
یەکیل لایتەر باڵیۆزی ئیسرائیل لە ئەمریکا، لە چاوپێکەوتنێکدا ڕایگەیاند، پێی وایە سوریا و لوبنان پێش وڵاتی سعودییە بچنە ناو ڕێککەوتنی ئەبراهام بۆ ئاساییکردنەوەی پەیوەندییەکانیان لەگەڵ ئیسرائیل.
باڵیۆزی ئیسرائیل ڕاشیگەیان: ئێستا هیچ هۆکارێک نییە بۆ ئەوەی لەگەڵ سوریا و لوبنان نەچینە ڕێککەوتنەکەوە. من زۆر دڵخۆشم سەبارەت بە ئەگەری ڕێککەوتنی ئەبراهام لەگەڵ سوریا و لوبنان و ڕەنگە لەڕاستیدا پێش سعودیە ڕووبدات".
لایتەر ئاماژەی بەوەشکرد، ئیسرائیل و سعوودیە هێشتا لەسەر ڕێگای ئاساییبوونەوەی پەیوەندییەکانیانن، هەرچەندە هێشتا ناکۆکی هەیە بەهۆی شەڕی غەززەوە.
سعودییە بۆ ئاساییکردنەوەی پەیوەندییەکان داوای ڕاگرتنی جەنگی غەززە و دروستکردنی دەوڵەتی سەربەخۆی فەڵەستین دەکات.
پێشتر ڕۆژنامەڵ وۆڵ ستریت جۆرناڵ بەپێداچوونەوە بەو بەڵگەنامانەی لە غەززە دۆزرانەوە بڵاویکردەوە، کە حەماس بەهۆی نیگەرانی لە ئاساییکردنەوەی پەیوەندییەکانی سعودیە و ئیسرائیل و پشتگوێخستنی کەیسی فەڵەستین شەڕی 7ی ئۆکتۆبەریان دەستپێکرد.