هەرێم نیوز
ڕەجەب تەیب ئەردۆغان، لەبارەی پڕۆسەی ئاشتییەوە وتارێکی پێشکەشکرد و ئاماژەی بەوەدا، 47 ساڵ پێش ئێستا یەکەم چالاکی تیرۆ دەستی پێکرد و تا ئێستا 50 هەزار هاوڵاتیی کوژراون، نزیکەی 10 هەزاریان سەرباز بون.
ڕه‌جه‌ب ته‌یب ئه‌ردۆگان له‌میانی وتارێكدا له ئه‌نقه‌ره‌وه، ڕایگه‌یاند، "47 ساڵ له‌مه‌وبه‌ر یه‌كه‌مین چالاكی تیرۆر ده‌ستیپێكرد و ڕۆژ به ڕۆژ تیرۆر زیاتر به‌ره‌و پێشه‌وه‌چوه، زیانی زۆر به‌ر توركیا گه‌یشتوه و زیاتر له 10 هه‌زار ئه‌ندامی هێزه ئه‌منییه‌كان گیانیان له‌ده‌ستداوه".
ئاماژه‌ی به‌وه‌شكرد، له‌دوای ده‌ستپێشخه‌ریه‌كه ده‌وڵه‌ت باخچه‌لی، سه‌رۆكی مه‌هه‌په قۆناغێكی نوێ ده‌ستیپێكرد و دواتریش دوای په‌یامی ئیمڕاڵی كه داوای كرد چه‌ك دابنرێت، رێكخستنه‌كانی په‌كه‌كه بڕیاری دانانی چه‌كیدا و دوێنێش بڕیاره‌كه‌ی جێبه‌جێكرد.
ده‌ڵێت، هه‌ندێك هه‌ڵه‌ی حكومه‌ته‌كانی توركیا "تیرۆر"ی زیاتر كرد له‌وانه ڕێگریكردن له زمانی كوردی، ئێستاش "پڕۆسه‌ی توركیای بێتیرۆر له ئه‌ندامی دانوستاندن نه‌هاتوه‌ته ئاراوه و له سه‌ره‌تاشه‌وه به وریاییه‌وه مامه‌ڵه‌مان كردوه".
ئه‌وه‌شی وت، "لاپه‌ڕه‌یه‌كی نوێ كراوه و كۆتایی به خوێن و فرمێسك ده‌هێنین، به نه‌مانی تیرۆر توركیا و گه‌لی توركیا قازانج ده‌كات و ده‌وڵه‌تی توركیا به‌هێزتر ده‌بێت، له ئاینده‌شدا هه‌رشتێك زیانی بۆ توركیا هه‌بێت ڕوبه‌ڕوی ده‌بینه‌وه".
ئه‌ردۆگان وتیشی، "ئەگەر تورک، کورد و عەرەب یەک بن، ئەگەر پێکەوە بن، سەردەکەون، کاتێک دابەش دەبن شکست و ڕسوابون و خەم هەیە، ئەمڕۆ ڕۆحی ئێمه نزیکتره، کاتێک دڵەکان یەکدەگرن، سنورەکان نامێنن، وەک هەنگاوی یەکەم، کۆمیسیۆنێک لە ئەنجومەنی نیشتمانیی گەورەی تورکیا دادەمەزرێنین و دەست دەکەین بە گفتوگۆکردن لەسەر مەرجە یاساییەکانی پرۆسەکە، بۆ ماوەی 41 ساڵ بارۆنە تیرۆریستییەکان و ئەوانەی خۆراکیان لە خوێن دەخۆن سەرکەوتنیان بەدەستهێناوە، ئەوانەی دیزاینی پیسیان لەسەر تورک و کورد و عەرەب هەیە، سەرکەوتنمان بەدەستهێناوە. ئەمڕۆ، ئێمە ئەم یارییە پیسە تێکدەدەن و پێچەوانە دەکەینەوە".
لە کۆتای وتارەکەشیدا، ئاماژەی بەوەکرد تورک و کورد و عەرەب بران، لە پەرلەمان کاردەکەن بۆ تەواو کردنی کارەکانی پڕۆسەی ئاشتی و ئیتر دایکەکان لە تورکیا فرمێسک ناڕێژن و رۆڵەکانیان لە دەست نادەن.
1ی تشرینی یەکەمی پار هەنگاوێک بۆ پرۆسەی چارەسەری لەلایەن دەسەڵاتی تورکیاوە نرا. ئەم پرۆسەیە لەلایەن حکومەتی تورکیا بە "تورکیایەکی بێ تیرۆر" لەلایەن دەم پارتیشەوە بە "پرۆسەی ئاشتی و چارەسەرکردنی پرسی کورد" ناو دەبرێت.
عەبدوڵڵا ئۆجەلان، رێبەری 26 ساڵ زیندانیکراوی پەکەکە، بە مەبەستی سەرخستنی پرۆسەی چارەسەری ئەم جارەی تورکیا، 27ـی شوباتی ئەم ساڵ داوای لە پارتەکەی کرد، کۆنگرە ببەستێت، خۆی هەڵبوەشێنێتەوە و چەک دابنێت.
پەکەکە لە 5-7ـی ئایاری ئەم ساڵ، 12ـەمین کۆنگرەی خۆی بەست و بڕیاری کۆتاییهێنان بە خەباتی چەکداری و خۆهەڵوەشاندنەوەی دا.