هەرێم نیوز

جێگری فەرماندەی ئۆپەراسیۆنە هاوبەشەکانی عێراق ئاشکرای دەکات، هەفتەی داهاتوو بنکەی سەربازیی عەین ئەسەد بە تەواوی ڕادەستی هێزە عێراقییەکان دەکرێتەوە و ڕاشیدەگەیەنێت، لەمساڵدا گورزی کەمەرشکێن لە داعش دراوە و والییەکەیان کوژراوە.

ئەمڕۆ چوارشەممە 31ی 12ی 2025، فەریق روکن قەیس محەمەداوی، جێگری فەرماندەی ئۆپەراسیۆنە هاوبەشەکانی عێراق لە کۆنفرانسێکی ڕۆژنامەوانیدا ڕایگەیاند، لەمساڵدا 37 ئۆپەراسیۆنی ئەمنی و 93 هێرشی ئاسمانی کراونەتە سەر داعش و تێیدا (ئەبو خەدیجە) والیی داعش و ژمارەیەک سەرکردەی دیکە کوژراون، بەمەش ڕێکخراوەکە توانای خۆڕێکخستنەوەی نەماوە.

سەبارەت بە کۆتاییهێنان بە ئەرکی هاوپەیمانان، محەمەداوی ئاماژەی بەوە دا، ئێستا هیچ ئەندامێکی هاوپەیمانان لەنێو فەرماندەیی ئۆپەراسیۆنەکان نەماوە و بڕیارە هەفتەی داهاتووش "بنکەی سەربازیی عەین ئەسەد" لە ئەنبار بە فەرمی ڕادەستی هێزە ئەمنییەکانی عێراق بکرێتەوە.

لە بەشێکی دیکەی قسەکانیدا، جێگری فەرماندەی ئۆپەراسیۆنەکان باسی لە دۆسیەی کەمپی هۆل کرد و وتی: "ئەمساڵ 15 کاروانی خێزانە عێراقییەکان گەڕێندراونەتەوە کە 2,954 خێزان بوون، بەمەش کۆی گشتیی گەڕاوەکان لە ساڵانی 2023 بۆ 2025 گەیشتووەتە 5,623 خێزان."