هەرێم نیوز
ڕێبەر ئەحمەد، وەزیری ناوخۆی حکومەتی هەرێمی کوردستان، سەرپەرشتی کۆبوونەوەیەکی فراوانی کرد بە مەبەستی توندکردنی ڕێکارەکانی پاراستنی ژینگە و بەرەنگاربوونەوەی زێدەڕۆیی لەسەر موڵکی گشتی.
ئەمڕۆ دووشەممە، 4ـی 5ـی 2026، لە دیوانی وەزارەت و بە ئامادەبوونی پارێزگار و سەرپەرشتیاری ئیدارە سەربەخۆکان و بەرپرسانی ئەمنی، کۆبوونەوەیەک بۆ تاوتوێکردنی پاراستنی سروشتی کوردستان و ڕێگری لە زێدەڕۆیی بەڕێوەچوو.
وەزیری ناوخۆ ئاماژەی بەوە کرد کە مەسرور بارزانی، سەرۆکی حکومەت، بایەخێکی تایبەت بەم دوو پرسە دەدات و پێویستە هەمووان وەک یەک تیم بۆ جێبەجێکردنی یاسای پاراستنی ژینگە کار بکەن.
لە کۆبوونەوەکەدا دەستخۆشی لە هەوڵەکانی پارێزگا و ئیدارەکان کرا بۆ ڕێگری لە زێدەڕۆیی و بڕیاردرا ئەزموونی "لێژنەی تایبەتمەندی هەولێر" بگوازرێتەوە بۆ سەرجەم پارێزگاکانی دیکە.
وەزیری ناوخۆ جەختی کردەوە کە چاوپۆشی لە هیچ کەسێک ناکرێت و ڕێکاری یاسایی توند بەرامبەر هەر کەسێک دەگیرێتە بەر کە بە شێوەیەکی نایاسایی دەست بەسەر موڵک و ماڵی دەوڵەتدا بگرێت، ئەمەش بە ئامانجی پاراستنی سەروەریی یاسا و مافی گشتی.