هەرێم نیوز
سەرۆکایەتیی ئەنجومەنی وەزیرانی هەرێمی کوردستان، لە بەیاننامەیەکی فەرمیدا بە توندی سەرکۆنەی هێرشەکانی کۆماری ئیسلامیی ئێران بۆ سەر خاکی هەرێم دەکات و داوا لە بەغدا و کۆمەڵگەی نێودەوڵەتی دەکات بێدەنگ نەبن.
شەرمەزارکردنی هێرشە بێ پاساوەکان
ئەمڕۆ هەینی ١٧ی تەممووزی ٢٠٢٦، سەرۆکایەتیی ئەنجومەنی وەزیرانی هەرێمی کوردستان ڕاگەیەندراوێکی فەرمی بڵاوکردەوە. لە ڕاگەیەندراوەکەدا هاتووە: "ئێمە لە حکومەتی هەرێمی کوردستان، بە توندی هێرشە بێ پاساوەکانی کۆماری ئیسلامیی ئێران بۆ سەر ناوچە جیاوازەکانی هەرێمی کوردستان شەرمەزار و سەرکۆنە دەکەین."
حکومەتی هەرێم هۆشداری دەدات لە لێکەوتەکانی ئەم بۆردومانانە و ڕایگەیاندووە، کە بەردەوامیی ئەم جۆرە هێرشە یەک لایەنە و سەربازییانە، دەبێتە هۆی تێکدانی ئاشتی و سەقامگیریی تەواوی ناوچەکە، کە ئەمەش خزمەت بە هیچ لایەک ناکات.
داواکاری لە تاران، بەغدا و کۆمەڵگەی نێودەوڵەتی
سەرۆکایەتیی ئەنجومەنی وەزیران لە پەیامەکەیدا، داوایەکی فەرمی ئاڕاستەی بەرپرسانی تاران دەکات و دەڵێت: "داوا لە کۆماری ئیسلامیی ئێران دەکەین، کە بە زووترین کات کۆتایی بەم هێرش و پێشێلکارییە سەربازییانە بهێنێت بۆ سەر سەروەریی خاکەکەمان."
لە کۆتایی بەیاننامەکەشدا، حکومەتی هەرێمی کوردستان ڕووی دەمی دەکاتە هاوبەشەکانی و ناوەندە جیهانییەکان و ڕایدەگەیەنێت: "داوا لە حکومەتی عێراقی فیدراڵ و هاوکات لە کۆمەڵگەی نێودەوڵەتییش دەکەین، کە بەرپرسیارێتیی یاسایی و ئەخلاقیی خۆیان هەڵبگرن و سنوورێکی یەکلاکەرەوە بۆ ئەم پێشێلکارییە بەردەوامانە دابنێن تاوەکو چیتر گیانی هاووڵاتییانی مەدەنی نەکەوێتە مەترسییەوە."