هەرێم نیوز
سوپای پاسدارانی ئێران بە فەرمی ڕایگەیاند کە زنجیرەیەک هێرشیان کردووەتە سەر دوو ناوەندی گرنگی لۆجستی و سەربازیی ویلایەتە یەکگرتووەکانی ئەمریکا لە هەردوو وڵاتی کوەیت و بەحرەین، ئەمەش ئاستی ململانێکانی ناوچەکەی گەیاندووەتە لوتکە.
لە بەیاننامەیەکی فەرمیدا، سپای پاسداران ئاشکرای کرد کە لە ڕێگەی هێرشی مووشەکی و درۆنییەوە، "کەناراوەی پشتیوانیی سووتەمەنی"ی کەشتیگەلی ئەمریکای لە بەندەری "ئەحمەدی" لە وڵاتی کوەیت پێکاوە. هاوکات، سپای پاسداران ڕایگەیاندووە کە ناوەندی کۆبوونەوەی فڕۆکە جەنگییەکانی ئەمریکایان لە بنکەی ئاسمانیی "شێخ عیسا" لە وڵاتی بەحرەین کردووەتە ئامانج. تاران ئەم هێرشانە وەک "وەڵامێکی کردەیی" بۆ ئەو بۆردومانانە وەسف دەکات کە ئەمریکا لە چەند کاتژمێری ڕابردوودا لە ناوخۆی ئێران ئەنجامی دابوون.
لە بەرامبەردا، ئەرکانی گشتیی سوپای کوەیت لە بەیاننامەیەکی بەپەلەدا پشتڕاستی کردەوە کە سیستەمەکانی بەرگریی ئاسمانیی وڵاتەکەیان کەوتوونەتە کار و خەریکی بەرپەرچدانەوەی هەڕەشە مووشەکی و درۆنییەکانن. سوپای کوەیت ئاماژەی بەوە کردووە کە ئەو دەنگی تەقینەوە بەهێزانەی لە ناوچە جیاوازەکانی ئەو وڵاتە دەبیسترێن، دەرەنجامی تێکشکاندنی "ئامانجە دوژمنکارییەکانە" لە ئاسماندا لە لایەن سیستەمی بەرگرییەوە پێش ئەوەی بگەنە شوێنی مەبەست.
بەپێی ڕاپۆرتە مەیدانییەکان، لە ئێستادا زەنگی ئاگادارکردنەوە (Sirens) لە سەرانسەری وڵاتی کوەیت لێدراوە و ترس و دڵەڕاوکێیەکی زۆر ناوچەکەی گرتووەتەوە. ئەم پەرەسەندنە نوێیە نیشانەی ئەوەیە کە مەیدانی جەنگەکە وڵاتانی کەنداوی بە شێوەیەکی ڕاستەوخۆ گرتووەتەوە و چیتر ململانێکان تەنها لە سنووری ئێران و ئەمریکادا نەماونەتەوە.