بە هۆی ئەو فشارە زۆرەی لە چەند مانگی ڕابردوو لەسەر شاسوار عەبدولواحید سەرۆكی جوڵانەوەی نەوەی نوێ هەبووە، لە ئێستادا هەر قسەیەك لە سەر كەسایەتی سیاسی ئەو پیاوە بكەین لەوانەیە ببێتە زوڵمێك و بە كوردییەكەی گوناهـ بار بین، ڕەنگە لە ئێستادا شاسوار عەبدولواحید ئیرادەی سیاسی لە دەست خۆی نەبێت و گومان دەكەم ڕاگەیاندن و پلاتفۆڕمەكانی سۆشیەڵ مێدیای جوڵانەوەکەی بە پەیجە تایبەتییەكەی خۆشیەوە لە ژێر دەستی برادەرانی یەكێتی بێت و ئەوان بۆی بەڕێوەببەن. هەرچەندە قسەكردن لە بارەی كاراكتەرە سیاسییەكان مافی هەموومانە و ئاساییە بۆچوونمان لە بارەی خۆیان و جوڵە سیاسییەكانیان بخەینەڕوو.
ئەوەی لە ئەلف و بێی سیاسەت تێبگات دەزانێ شاسوار عەبدولواحید كەسێكی سیاسی نیە، بەڵكو كەسێكی بازرگانە و لە ماوەی ڕابردوو خەریكی كار و كەسابەتی خۆی بووە، بەڵام ڕۆژگار شاسواری كردە كەسایەتییەكی سیاسی و خاوەن نفوزی جەماوەری و كورسی پەرلەمانی.
سروشتی شاسوار عەبدولواحید وایە حەزی بە خۆدەرخستن و خۆ نمایشكردنە، وە خەسڵەتێكی دیكتاتۆریانەی هەیە، هەروەها خاوەن كەناڵێكی كاریگەر و بەهێزی وەك ئێن ئاڕتی یە، بە دڵنیایەوە ئەمانە هەمووی بە وردی دیراسەكرا، پاشان هینرایە ناو گۆڕەپانەكە و كرایە كەسایەتیەكی سیاسی.
هێنانە پێشەوەی شاسوار عەبدولواحید بۆ ناو گۆڕەپانی سیاسی و پیشاندانی وەك كەسایەتیەكی سیاسی ئۆپۆزسیۆن چەند ئامانجێكی هەبوو، لەوانە كۆكردنەوەی میراتی جەماوەری بزووتنەوەی گۆڕان لە بازنەی جوڵانەوەیەكی لۆكاڵی و سەرۆكێكی دەستەمۆ، هەروەها بێ ئومێدكردنی دەنگدەرانی ناڕازی لە ئۆپۆزسیۆن بە گشتی لە ڕێگای جوڵە گوماناوییەكانی سەرۆكی جوڵانەوەكە و چەند كەسایەتیەكی تری سیاسی، واتە شاسوار عەبدولواحید ڕاسپێدرا بە بەرگی ئۆپۆزسیۆن لە پاڵ دژایەتی كردنی دەسەڵات دژایەتی بەرەی ئئۆپۆزسیۆنیش بكات.
پڕۆسەی پێكهێنانی هاوپەیمانی لە نێوان یەكێتی نیشتیمانی كوردستان و نەوەی نوێ بەشێكە لە گەمەی دیموكراسی و پیرۆزباییان لێ دەكەین، هەرچەندە ئەم هەنگاوە ئیعلانی مەرگی جوڵانەوەی نەوەی نوێیە، بەڵام هێشتا هەناسەیەك ماوە تا ئەو كاتەی یەكگرتنی فراكسیۆنی نەوەی نوێ (هەموویان نا) و فراكسیۆنی یەكێتی نیشتیمانی ئیعلان دەكرێ، ئەوكات كۆتا بزمار لە تابووتی سیاسی شاسوار عەبدولواحید دەدرێ.
ئومێدەوارین یارییەكە تەواو بكەن.