هەرێم نیوز 

وه‌زاره‌تی دارایی هه‌رێم ڕایگه‌یاند، بەشی گەنجینەی فیدڕاڵی لەداهاتی نانەوتی هەرێم خرایە سەر هەژماری وەزارەتی دارایی فیدراڵ كه‌ بڕه‌كه‌ی 50 ملیار و 522 ملیۆن دیناره‌.                                                                                  

ئه‌مڕۆ پێنجشه‌ممه‌، 22ی 5ی 2025، وه‌زاره‌تی دارایی و ئابوری حكومه‌تی هه‌رێمی كوردستان بڵاویكرده‌وه‌، ئه‌مڕۆ پێنجشه‌ممه‌ بەشی گەنجینەی فیدراڵی لە داهاتی نانەوتی هەرێمی کوردستان بۆ مانگی نیسانی ساڵی 2025 کە بڕەکەی 50 ملیار و 522 ملیۆن و 750 هه‌زار دیناره‌ بەشێوەی کاش خرایە سەر هەژماری بانکی وەزارەتی دارایی حکومەتی فیدڕاڵ لەلقی هەولێری بانکی ناوەندی عێراق.

به‌پێی یاسای بودجه‌ی عێراق، هه‌رێمی كوردستان پابه‌ندكراوه‌ به‌ پێدانی 50%ی داهاتی نانه‌وتی و 250 هه‌زار به‌رمیل نه‌وتی ڕۆژانه‌ له‌ به‌رامبه‌ردا حكومه‌تی عێراق موچه‌ی ته‌واوی موچه‌خۆرانی هه‌رێمی كوردستان خه‌رج ده‌كات.

ئەمە لە کاتێکدایە، ڕۆژی سێشەممە، 13ـی ئایاری 2025، بەغدا بڕی 959 ملیار و 514 ملیۆن دیناری وەک شایستەی مووچەی فەرمانبەران و مووچەخۆرانی هەرێمی کوردستان خستە سەر هەژماری بانکی وەزارەتی دارایی و ئابووریی هەرێمی کوردستان، لە لقی هەولێری بانکی ناوەندیی عێراق. 

هەمان ڕۆژ، وەزارەتی دارایی و ئابووریی حکوومەتی هەرێمی کوردستان لیستی خشتەی مووچەی مانگی نیسانی بڵاو کردەوە، کە ڕۆژی چوارشەممە، 14-05-2025، دەستی پێ کرد و تا ڕۆژی یەکشەممە، 18-05-2025، بەردەوام بوو.