هەرێم نیوز
عەلی زەیدی، ڕاسپێردراو بۆ پێکهێنانی کابینەی نوێی حکومەتی عێراق، بە مەبەستی گفتوگۆکردن لەسەر پرسی پێکهێنانی حکومەت و دیاریکردنی پشکی کورد، سەردانی هەرێمی کوردستان دەکات و لەگەڵ لوتکەی دەسەڵاتی سیاسی لە هەولێر و سلێمانی کۆدەبێتەوە.
هەولێر؛ وێستگەی یەکەمی گفتوگۆکان
بڕیارە زەیدی لە شاری هەولێر لەگەڵ بارزانی و نێچیرڤان بارزانی، سەرۆکی هەرێمی کوردستان و مەسرور بارزانی، سەرۆکی حکومەتی هەرێمی کوردستان کۆببێتەوە. تەوەرەی سەرەکی کۆبوونەوەکان بریتی دەبێت لە شێوازی بەشداریی کورد لە حکومەتی نوێ و دەستەبەرکردنی مافە دەستوورییەکانی هەرێمی کوردستان.
سلێمانی و دیدار لەگەڵ یەکێتی
دوای تەواوبوونی دیدارەکانی لە هەولێر، عەلی زەیدی ڕوودەکاتە شاری سلێمانی و لەگەڵ بافڵ تاڵەبانی، سەرۆکی یەکێتیی نیشتمانیی کوردستان کۆدەبێتەوە، تاوەکو ڕوانگەی ئەو حزبەش سەبارەت بە کارنامەی حکومەت و دابەشکردنی پۆستەکان وەربگرێت.
پشکی کورد و گۆڕانکارییە ئەگەرییەکان
بەپێی زانیارییەکان، پێناچێت پۆستە وزارییەکانی کورد لە بەغدا گۆڕانکاریی ڕیشەییان بەسەردا بێت. ئەگەری بەهێز ئەوەیە پارتی و یەکێتی هەمان ئەو چوار وەزارەتەی حکومەتی سودانی (دەرەوە، داد، ئاوەدانکردنەوە و ژینگە) وەربگرنەوە. هاوکات دەنگۆی ئەوە هەیە کە زەیدی چەند جێگرێک بۆ خۆی دابنێت و یەکێک لەو جێگرانە پشکی کورد بێت و بەر پارتی دیموکراتی کوردستان بکەوێت.
سیناریۆی بایکۆتی پارتی
سەبارەت بە هەڵوێستی پارتی، ئەگەر ئەو حزبە بڕیاری بایکۆتکردنی حکومەت و پەرلەمان بدات، ئەوا پۆستەکانی لە بەغدا بە بەتاڵی بۆ بەجێدەهێڵرێت تا ئەو کاتەی بڕیاری گەڕانەوە بۆ ناو پرۆسەی سیاسی دەدات، ئەمەش وەک هێمایەک بۆ گرنگیی بەشداریی پارتی لە سەقامگیری کابینە نوێیەکەدا دەبینرێت.