هەرێم نیوز
تۆڕی هەواڵی "سی ئێن ئێن"ـی ئەمریکی ئاشکرای کردووە که ئیسرائیل ئەنجامدانی هێرشی نوێی بۆ سەر ئێران دواخستووە و ڕازیبوونی کۆتایی سەرۆکی ئەمریکای کردووەتە مەرج بۆ جێبەجێکردنی پلانەکەی.
گوشارەکانی نەتانیاهۆ و هەڵوێستی ترەمپ
بەپێی ڕاپۆرتەکەی سی ئێن ئێن، سەرەڕای گوشارەکانی بنیامین نەتانیاهۆ، سەرۆکوەزیرانی ئیسرائیل، بۆ سەر دۆناڵد ترەمپ بە مەبەستی ئەنجامدانی هێرشی نوێ بۆ سەر ئێران، بەڵام ترەمپ ڕەتی کردووەتەوە بەر لە بەڕێوەچوونی هەڵبژاردنی نیوەخولیی کۆنگرێسی ئەمریکا، گڵۆپی سەوز بۆ تەلئەبیب هەڵبکات و ڕەزامەندی لەسەر هێرشەکە بدات، ئەمەش هۆکاری سەرەکیی دواکەوتنی هێرشەکەی ئیسرائیل بووە.
کەمیی کۆگاکانی بەرگریی مووشەکی و پشتیوانیی واشنتۆن
لە زانیارییە زیاترەکاندا ئاماژە بەوەش کراوە کە بەشێکی دیکەی دواخستنی ئەم هێرشانە دەگەڕێتەوە بۆ پێویستیی ئیسرائیل بە پشتیوانیی سیستمی بەرگریی مووشەکیی ئەمریکا؛ چونکە کۆگاکانی بەرگریی ئیسرائیل بەهۆی شەڕەکانی ئەمساڵەوە دووچاری کەمبوونەوە و کورتهێنانی بەرچاو بوونەتەوە.
پلانی ئامادەکراو و کاتی ئەگەریی هێرشەکە
سەرچاوەیەکی ئاگادار بە کەناڵەکەی ڕاگەیاندووە کە پلانی سەربازیی ئیسرائیل بە تەواوی ئامادەیە و تەنیا چاوەڕێی پەسەندکردنی کۆتایین لە لایەن ترەمپەوە. سەرچاوەکە ئاماژەی بەوەش کردووە کە ئەگەری هەیە ئەنجامدانی هێرشەکە بکەوێتە دوای هەڵبژاردنەکانی ئەمریکا کە تەنیا هەفتەیەکی ماوە.